陸羽仁 - 國貨唔怕買

美股上日回軟，昨日亞洲區內股市普遍受壓，恒指跟隨低開187點，在中資股走低拖累下，反覆尋底。午後愈跌愈低，更以接近全日最低位收市，結束了連續三日的升勢。恒指收報20342點，跌380點或1.8%。

港股弱過美股

睇完昨日港股個市，可以得出一個結論，近期內地股市弱過美股，港股同內地股難兄難弟，反彈唔係幾有力。美股杜指經過兩日急升後在周三回吐0.26%，昨日上證綜指跌0.28%，而港股更跌1.8%，將早一日的升幅嘔番大半出來，10天線好快又穿番。

個市好靜，散戶潛水，經紀張無厘神氣，問我有乜嘢好做，我話你又話想做長線投資者(佢講咗20年從未成功做過投資者，只係識做投機者)，?家個市靜靜地，先至係投資好機會，無嘢做就慢慢買吓國貨啦。

經紀張可能無乜生意心情唔好，一句頂番過來，話「你估好似以前國貨公司門口掛個牌咁講呀，『愛祖國，用國貨』呀，呢排內地股市3000點都守唔住呀，你仲

叫我買國貨？」

我唔知經紀張做乜咁大火氣，我一於以柔制剛，來一招「訴諸權威」，話滙豐的資深股票策略師孫瑜(StevenSun)上星期尾出咗份報告，叫人唔使驚內地調控，可以擇優買H股噃。

孫瑜的報告題為「中國策略———市場迷惑？我們有一個路線圖」。佢話近日中國政府控制銀行放貸，好多媒體報道中國收緊新借貸，但孫瑜認為，如果投資者唔知? 家應該做乜，咁就睇番04年的經驗，03年沙士爆發，中央大力放鬆銀根抗災，到04年通脹開始上，中央就推出收緊措施，第一招出街後，大市在一個月內跌了 15%至20%，在出招後第一季股市跌完打橫行，但在第二季又慢慢上，經驗告訴大家，市場調整時，要在跌時買貨！

調控係入貨時機

孫瑜話有兩個原因可買：第一，中央政府唔係限制新信貸，而係調控每一季推出的信貸的模式，唔想太多信貸逼在年頭湧出。第二，資金流動性會變得溫和，但不阻礙增長。既然係咁，孫瑜話佢對2010年全年各指數的目標無改變，上證綜指睇3500點，恒指睇26000點，國企指數睇16000點，佢鍾意H股多過A 股。

各行業中，孫瑜認為可以增持內銀股，因為佢哋股價都只係2010年估計盈利的10倍PE而已。佢睇淡內地電訊股，試為盈利增長會轉弱，低股息收益，又有政策風險，佢估中國電訊業09年盈利跌12.6%，今年打橫行。佢對能源股中性，認為前景正面，相對市場其他股份有折讓。睇完孫瑜的報告，你會有個感覺，內地一話宏調或收緊，市場反應好大，這就是內地股市近期積弱的原因，但拉長少少睇，又可能係反應太大了，因為中國今年若要保持9至 10%增長，無資金又點得呢？只不過係唔想咁過量啫。

有報道指港府正研究將對樓價逾2000萬元私人住宅的印花稅，從3.75%上調至4 .5%，以壓制投機性活動。表明政府對豪宅市場過熱的憂慮。不過中銀國際認為，上調幅度僅為0.75%，對豪宅市場影響仍很小。在大型開發商中，長實 (001)和新世界(017)在豪宅市場的參與度較低，受上調印花稅影響不大，並最看好新地(016)和恒地(012)。