陸羽仁 - 唔輸就可做富翁

上周有單新聞值得一提，就是有調查話09年本港千萬富翁人數回升至39.4萬人，按年增13%，而人均流動資產達380萬元，亦較08年多12%。

好多人以為做千萬富翁要好識搵錢或好識投資，但我估計實情唔係咁。我認為人人都有機會做千萬富翁，即使你只有中學畢業，月入一萬幾千，都有機會做千萬富翁，關鍵要儲錢投資，同埋盡量唔好輸錢。

香港在70年代中經濟起飛，只要在那二十年間買兩間樓，揸到而家都變千萬富翁。香港第二個富貴期由03年沙士開始，至阿爺放自由行、放國企來香港上市，造就第二個浪，呢次就發咗啲做富貴生意的人。

儲蓄投資不二法門

現時香港經濟進入高原，樓價唔平，唔好盲目相信買樓揸20年可以做千萬富翁。然而，儲錢及投資還是致富的不二法門，如果你夠後生，另一個關鍵是少輸，即使唔可以一朝發達，但累積下去，每年增加投資額，一年有10幾個巴仙回報，捱20、30年，有過千萬資產，一啲都唔奇。但你炒到好勁，又贏又輸，今年10萬變 50萬，明年50萬變番5萬，搞上搞落，就唔係咁易富貴啦。

網友大笨袋鼠對以上言論有些回應，佢話︰「利用複利滾存來儲蓄致富，愈是早期儲蓄，所發揮的威力就愈大。但這樣一來，和另一個講法有點衝突；好多時話，要博趁後生博，跌低咗都仲有大把青春企得返身。當然，博得到，早期用作複利滾存嘅資金多了，但博唔到，那就損失了早期可用資金的複式威力。」

大笨袋鼠講到的「要博趁後生博」，亦係好多人買股時提到的說法，其道理係咁，你剛出來打工，儲到一兩萬元，若叫你投資，股神巴菲特一年都係10至20%回報，1萬元只賺2000元，頗有賺埋唔夠食的感覺。但你攞一兩萬去博，去投機，博中1萬變10萬，到時再投資都未遲，輸晒1萬亦可以再搵過。相比之下，到40歲時，有100萬身家，輸晒就好大鑊，要儲20年先搵得番。

慣咗投機難收手

呢個講法唔係唔啱，但係要明白，博開好難收手，慣咗投機，即使叫你分一半投資一半投機，你都唔願意，覺得投機太慢，唔過癮。不少人一路投機下去，贏錢自然唔緊要，但有啲人一路投機都輸大錢，但偏要每次都賭盡每一毫子，睇到佢咁，只能寫個服字。

內地就快推出股指期貨，即係我地香港的期指，睇電視見記者在上海訪問一個阿叔，佢話好想玩股指期貨，喜歡佢快上快落，買股票賺錢太慢啦，仲話自己做模擬股指期貨交易，用一百萬賺咗成一千萬，所以好心急等股指期貨開場。

模擬勿當真期指唔易玩

我話呢個阿叔，一係賭聖，一係傻佬。若果佢係賭聖，真實炒期指時仍然大贏特贏，但是這個情況只是十中無一，甚至百中無一，因為期指是零和遊戲，有一個大贏，起碼有十個人小輸。佢也可能係一個傻佬，依家內地無期指，個市上落正常啲，慢啲，你做模擬交易較易贏，到真係有期指時，就係兩回事，大戶睇住散戶底牌開牌，你買升，佢就買跌，即使大市真係要升，佢都插你一兩千點，插到你投降先至升，散戶唔係咁易夠人玩。

所以我話年輕人炒吓唔妨，輸咗可以嚟過，但要記住，隨着年齡增長，就要加大投資的比例，控制投機的銀碼，除非你係賭聖，咁當然係例外，但睇吓自己投機的往績，就知自己係唔係賭聖啦。