陸羽仁 - 獅王失意還看內銀

在滙控(005)公佈業績前夕，港股在3月份第一個交易日，可以講係氣勢如虹，投資者預期滙控於午後公佈嘅業績應該有不錯的表現，市場投資氣氛熾熱，加上內地股市及中資股，尤其係內銀股齊齊走高帶動。

恒指收報21057點，大漲448點，期指收報20983點，升446點，比現貨低水74點，成交68826張。國企指數走勢更凌厲，收報11913點，勁升3706點或3.2%。大市成交大增至680億元。

滙控昨日仍升0.9%，收86.65元，不過佢在收市後公佈份成績表就唔係好靚仔啦，去年純利58億美元(452億港元)，只是比08年微升2%，大家唔好忘記，08年係雷曼爆煲之年，去年下半年卻是環球復甦之年，但滙控去年業績卻無大改善。據彭博通訊社統計12個分析員的預測，估計滙控去年純利的中位數係 77.6億美元，實際利潤遠低於此數，只及分析員預計的下限。滙控公佈業績後，在倫敦市初段急插3% 。滙控第四季派息10美仙，全年派息34美仙，以昨日收市價計全年息率3厘，外界傳佢第四季派高息，又係流料。本來滙控市盈率唔低，外界本來期望盈利上升拉低市盈率，怎料事與願違，按09年盈利計，滙控市盈率25倍，並唔算平。業績公布後，滙控在倫敦開市後，碌到去80元樓下，反映市場對成績表失望。

滙控PE拉唔低

滙控業績唔理想，和大筆撥備有關，佢在09年在265億美元壞帳減值和信貸撥備，比08年仲要高9%。其實大家都係估緊滙控撥備條數，估佢若比08年金融海嘯時減少撥備，單係呢一筆都可以有不少進帳，但估唔到09年的減值和撥備仲要多過08 年，唔知佢係唔係因為歐豬五國的危機，要增加對歐洲業務的撥備。

在滙控各項業務中，只有投資銀行業務稅前利潤大幅增加，由08年的30億美元，跳升到105億美元，在美國狂派錢救市的情況下，投行賺大錢絕不為奇，問題是這種高增長能否持續。各地業務中，最衰的仍是美國，滙控北美業務蝕77.4億美元，雖然比08年勁蝕155.3億美元好好多，但仍然流緊血。總的來說，滙控業務改善幅度未如外界估計，未能完全走出金融海嘯的陰霾。

滙控個仔恒生(011)表現亦一般，去年純利132億，按年跌6.2%，全年派 5.2元利息，比對上一年跌17%，息率亦由5.4厘降到4.5厘，仲算高息股。恒生業績回落，主要因為行業競爭劇烈，息差收窄。我一年前已講過，本地銀行生意唔易做，因為傳統放貸生意睇息率，利率跌落來，加上銀行水浸，令息差收窄。銀行早幾年大力發展的理財業務，在雷曼事件後又打到半殘，銀行要有段時間回吓氣。

地產股業績唔差

在巨企中滙控打頭陣公布業績，但係呢個鑼鼓唔係打得幾響，佢係權重股，自然對大市有壓力。中環茶友話，未來個市要睇本地地產公司，業績應該唔差，長實(001)之類巨股條數應該靚。但真係要睇吓紅色股、特別係內銀股的表現如何，外界有點擔心佢放出巨額貸款後有無壞帳問題，所以紅色銀行股是好是壞，左右大市。

昨日恒指普遍向上，成份股中只有恒隆地產(101)逆市下跌2%，其餘全線走高。帶動港股大升嘅火車頭係金融股，其中尤以中資金融股的漲勢更為明顯。

「四保七行」全線大幅上漲，其中國壽(2628)升1.9%，平保(2318)升2.8%，財險(2328)升2.1%；建行(939)及中行(3988)升4%；工行(1398)升5.1%，中信銀行(99 8)更大升6.9%，頗有餓炒好耐要炒番轉之勢。

hightea@hkheadline.com