青心直說：家族傳承缺危機感出事

全球汽車業一哥，豐田嘅油門問題有如雪球般越滾越大，事件一發不可收拾。豐田第四代掌門人豐田章男在美國被議員公審後，聲淚俱下見傳媒話好多謝咁多人支持佢，主要係擴張過快忽略咗質量問題，鄭重向公眾道歉。呢次全球回收 850萬部車，「日本製造」嘅質量保證同消費者信心跌落谷底，美國國會議員當然唔放過政治秀機會，有女議員就哭訴豐田可恥。豐田呢間百年老店成就驕人，近幾年更成為汽車業界典範。一如本地老牌大銀行，豐田家族式管理一直獲得市場掌聲，創辦人豐田喜一郎嘅營商 DNA代代相傳，創造一個又一個奇蹟。有咁好嘅 DNA，都係拜佢爺爺豐田佐吉所賜。話說 19世紀末，當時佢仲係窮光蛋一個，跟阿爸學做木工，有日佢見到屋企啲女人，每日織布都要好辛苦咁用手動織布機，於是就鑽研點樣將佢自動化，結果又俾佢搞掂，當時未有電力供應，要用蒸氣機，但無阻佢嘅決心。
豐田事件引以為鑑

1926年，豐田佐吉創立豐田自動織布機工廠，即係豐田集團母公司，佢嘅獨門武器係當紡線一斷，織布機會自動停止運轉。就係靠呢種「防止錯誤」（ Mistake-proofing）理念，豐田多年來一直跑贏同業，亦係佢賴以成功嘅核心價值。不過去到第四代，豐田勇於從錯誤中學習嘅精神不再，取而代之係急功近利嘅「捽數」文化，部門間為求表現，不惜做假報告，以一個又一個嘅大話去圓謊，最終東窗事發引致火燒連環船。富豪後代統領家族企業，無論個人定整體企業營運，壓力之大不足為外人道。一方面要背負前人「太叻」嘅包袱，想要青出於藍，好易心急走歪路；另一方面要改革大企業嘅百年陋習，一啲都唔易。唔怪得話「富不過三代」，呢句說話簡真係放諸四海皆準。香港唔少家族式巨企正面臨類似豐田嘅換班樽頸，第三代又好、第四代都好，活生生嘅例子就喺眼前，出門口去 Clubbing前請多留意呢單新聞，引以為戒。胡孟青